泛民立法會議員喺議會中啟動不合作運動，人民力量議員陳偉業（大舊）尋日喺內務委員會（內會）及財會選舉正副主席時，不停咁提名其他議員搞亂檔，擺明係要拖延時間，最終都只係阻延約半小時，但就畀人好兒戲嘅感覺。內會選舉時，泛民兩位候選人范國威同「長毛」梁國雄更以低得票，雙雙敗走，泛民動作多多，究竟可以收穫乜嘢呢？

設計圖片及對白

大舊尋日漁翁撒網式提名，結果建制派嘅鍾樹根、蔣麗芸、王國興、田北辰（田二少）甚至林大輝等，都一一成為佢提名嘅對象，不過，被提名嘅並唔受大舊嘅青睞喎，樹根就話︰「梗係唔接受啦，咁無謂嘅人！」田二少亦表現得好不滿話︰「第五個先諗起我，咁唔好喇。」王國興就劈頭大罵大舊利用提名權嘥時間。

去到投票時，建制派人多勢眾，梁君彥以三十九票擊敗分別得到十四票嘅長毛同六票嘅范國威；財會方面，同樣由飲食界張宇人同保險界陳健波分別當選正、副主席。建制泛民鬧交鬧不停，有泛民議員要建制派「票債票償」，工聯會黃國健就寸爆話︰「講票債票償？直選你都唔敢參加啦！」結果原定開半小時嘅內會足足嘥咗約三個鐘先完成，拖累緊接嘅財會又遲遲未結束。

第一手消息請下載on.cc東網iPhone/iPad/Android/Windows Phone Apps