政壇：示威者佔領立會會議室
佔領佔到上立法會議員辦公樓上，我哋連日跟進部分泛民主派立法會議員濫用接待訪客規定，過去多日不斷招呼大批佔領行動示威者上會議室二十四小時開會兼瞓覺，甚至有傳某泛民議員將立法會變為「佔中總部」。雖然有建制派議員先後向秘書處及主席曾鈺成投訴，但班泛民議員非但無收斂，有人更加縱容示威者將摺床搬入會議室，認真離譜。
立法會會議室內除咗大聲公同示威物資外，有人仲夠膽將幾張床搬入去。（受訪者提供）
根據建制派提供嘅相片顯示，示威者除咗將大批大聲公同物資存放在立法會十樓會議室外，有人仲搬咗四張床同被鋪入內，加埋幾個枕頭，會議室隨即變成劏房。為咗令會議室有更多空間等示威者可以「屈蛇」，泛民議員更將會議室內嘅長方形枱疊埋一齊，又將啲櫈擺埋一邊，搞到其他人唔可以用會議室開會。
見到示威者連床都夠膽搬入會議室，議員葛珮帆尋日就即刻去信批評秘書長陳維安執法不力，要求秘書處即刻採取措施驅逐所有留宿嘅示威者，以及限制訪客進入大樓嘅時間，咪當立法會係無掩雞籠。
