政壇：立會口水戰拗點查佔中
立法會大會延遲召開，但無損一眾議員打牙骹、搶風頭，尋日內務委員會開會，其中一個議題係討論商界立法會議員林健鋒（Jeffrey）提出要引用《立法會（權力及特權）條例》成立委員會調查佔領行動嘅組織策劃、資金來源、引起公共秩序及安全問題。呢個議題夠晒矚目，泛民議員都要趁此機會查警方，雙方又係一輪口水戰。
譬如，有議員質疑立法會過往一直只監察政府及執法機關有冇濫權，未聽過要調查市民集會同示威，質疑Jeffrey呢個提議有冇問題，Jeffrey就即刻反駁話︰「我哋係調查，唔係查！」大家聽完都諗爆頭，唔明「調查」同「查」有咩分別，唔通Jeffrey想為「調查」同「查」開創新定義？Jeffrey會後解釋，其實佢意思係想講「調查」，唔係「審查」示威者，只係一時口快講錯啫。
泛民陣營亦攞嚟拗，譬如張超雄就質疑呢輪唔少人話佔領行動後面有外部勢力，咁係咪呢個委員會要一一召啲外國駐港領事人員嚟作供呢？講嚟講去，大家都係各有關注，互斥不是，嘥氣！另外，有建制派議員質疑部分泛民議員被指收受政治捐款，反對調查係怕愈揭愈臭。議員梁美芬嘅提議，就被指把政治捐款「袋住先」嘅工黨李卓人大唱生日歌遮醜。
