政壇：周諾恆佔領區開枱認衰
佔領行動遲遲未解決，原本爭拗不絕嘅旺角佔領區，前晚更有人喺創興廣場對出一段彌敦道，擺放乒乓球枱打波、開枱打麻雀，仲有人帶埋爐具打邊爐開餐，十足舉行嘉年華會。
周諾恆（左二）前晚用手機拍攝彌敦道開枱打麻雀嘅盛況，最終要道歉收場。（資料圖片）
呢件事引嚟好多爭論，有人鬧爆影衰市民佔領要道爭取民主呢個行動，亦有人對有關人士喺通道上做挑釁行為更火滾。
不過，都有支持者話，呢啲叫打仗都要輕鬆吓喎，最終警方以安全理由介入後，全部收檔。
但係，事件仲有餘波嘅，前晚有份參與旺角嘉年華嘅社運人士周諾恆，尋日就在社交網站認衰，話自己「嚴重錯判氣氛」、「手法太冒進」、「冇好好解釋想法」，所以對所有人道歉。
