政壇：男高官返工變沉默步兵
今次佔領行動中，一班公務員成為磨心，通往政府總部入口嘅天橋先係全封閉，拉鋸後總算開咗個口，三千個公務員總算有工返喇，但因為車路依然未打通，原本有座駕或自己駕車返工嘅公僕都要變步兵，尋日，商務及經濟發展局副局長梁敬國（Godfrey）亦步行返工，大家本嚟想問佢個局呢輪處理商界訴苦嘅事，點知Godfrey低頭不語。
設計圖片及對白
佔領行動愈拖愈耐，商界壓力就愈來愈大，Godfrey今日起又要署任局長三日，佢一早搬出沉默政策應付，係要作無聲抗議、定係有苦說不出呢？
女高官多嘢講
尋日經政總天橋返工嘅仲有教育局政治助理施俊輝（Jeff），無獨有偶，佢一樣唔肯回應事件，仲顯得相當怕醜添。
諗番過去幾日，好多女高官都途經政總天橋返工，包括行政署署長蔡潔如、財經事務及庫務局常任秘書長區璟智及謝曼怡、康文署署長李美嫦等人，當時大批傳媒包圍佢哋，一眾女官員都人人有嘢講，唔係停低講番兩句佔領行動對政府嘅影響，就係作啲呼籲，譬如有「頭箍小姐」之稱嘅區璟智就勸市民在參與佔領時要守秩序，珍惜香港作為安全城市嘅美譽；而謝曼怡更加叫人唔該畀條路佢行吓。
點解尋日兩名男官就不約而同封嘴呢？有人猜測係咪政府嘅公關戰術？因為公務員只能行天橋一側嘅窄通道，對於拎住公事包、可能仲踩住高踭鞋嘅女性高官真係一個挑戰，至於男性高官就可能畀人剛強嘅感覺，所以佢哋嘅沉默，已經係一種態度。
