亞運捷報頻傳 香港精神不死
捷報頻傳，可喜可賀，香港運動員喺仁川亞運屢創佳績，令人鼓舞，亦令人喝采。「牛下女車神」李慧詩連下兩城，成為首位喺一屆亞運奪得兩面金牌嘅香港選手；而體操小子石偉雄就力壓南韓奧運冠軍，勇奪跳馬金牌，同樣寫下香港歷史。健兒以出色嘅表現，再次證明香港運動員唔係垃圾，亦再次證明香港精神永遠唔會過時！
值得一提嘅係，石偉雄同李慧詩都係土生土長嘅香港人，同樣經歷過唔少挫折同失落，憑着一股唔認輸唔放棄嘅精神，勇往直前，先至取得今日嘅佳績。試諗吓，港府對體育嘅支持一向得把口，姿勢多於實際，運動員嘅訓練條件以及得到嘅支持，同內地「舉國體制」之下嘅運動員根本冇得比，如果唔係有理想同堅持，點可能成功呢？更難能可貴嘅係，體操項目一向係香港嘅弱勢，根本冇人諗到有穿金戴銀嘅一日，所以話，呢塊體操金牌背後嘅努力同辛酸，簡直令人難以想像。
正如古人話齋，天行健，君子以自強不息。做運動員難，做香港運動員更難，佢哋唔止要流汗流血，更要忍受孤獨寂寞，付出嘅努力遠遠超過其他人，但佢哋冇怨天尤人，而係頑強拚搏，遇強愈強，真係唔到你唔佩服o架。近年好多人討論香港精神，其實，運動員呢種自強不息嘅精神咪就係香港精神囉！
以前香港人腳踏實地，同舟共濟，創造出無數獅子山下嘅傳奇，將香港由一個小漁村變成一個國際大都會，令舉世矚目。可惜時移勢易，今日香港浮躁不安，肯埋頭苦幹嘅人愈來愈少，有啲人淨係識得怨天怨地怨社會。更可怕嘅係，隨着社會高度政治化，連校園亦不得安寧，學生想專心讀書都唔得，再咁落去，香港除咗盛產街頭鬥士之外，仲有乜嘢前途呢？
逆水行舟，不進則退。香港回歸後經濟低迷，民生凋敝，競爭力每況愈下，邊緣化危機迫在眉睫，港府管治無能固然係主要原因，而政客搞風搞雨，唯恐天下不亂，同樣難辭其咎。香港百年基業毀於一旦，前景暗淡，究竟何去何從，令人無所適從。今次健兒喺亞運奪取佳績，正如一劑強心針，希望可以激勵香港人再度發揚獅子山精神，自強不息，走出困局，再創輝煌。石仔，阿詩，你哋係值得自豪、值得驕傲嘅！
