話說淫賤黎近排黑氣纏身，三日唔埋兩日就台港兩頭騰，或者佢可能知道大限將至，所以頻頻撲撲交代後事啦，而我處身呢個「後壹全霉」時代，都冇諗嘢喇，總之日日軀殼上班靈魂偷懶，唔係點對得住份糧？就喺我沉醉於偷懶之際，一座移動肉山好似殺人咁款衝埋嚟，呢個肥豪，又想搞邊科？

「腦腫，我都忍得你耐喇！明明應承話加人工，點解今時今日都係得個吉？你係咪玩我吖？係就出聲，我即刻反枱！」喺職場咁多年，我學曉咗好多道理，包括「唔撈至大」呢個真諦。眼見肥豪透出反枱就走嘅氣魄，如果唔立刻安撫佢，我人身安全都未必保障到，心念一轉，本虫力拔山兮氣蓋世咁，自己反枱先！

「肥豪！講反枱，我反先啦！六歲嗰年，老竇話畀個官我做，我咪冇畀心機讀書囉，點知我老竇呃我啫！搞到今時今日要屈喺壹全霉，你估好好受！仲有呀，唔係淨係得你冇人工加o架，我做咗腦腫咁耐，淫賤黎不下九千次話加我人工啦，邊次兌現過？反枱反枱，反吖！反吖！反吖！」肥豪見我反吖反吖咁，即刻失晒霸氣，好似喪家犬咁返埋位，而本虫亦因為反枱搵番隻「直豎拇指」珍藏版，可謂一舉兩得。

第一手消息請下載on.cc東網iPhone/iPad/Android/Windows Phone Apps