SUN奇古怪：SUN潮語：【袋住先】
「袋住先」絕對稱得上一個潮語，因為自從人大常委會落閘之後，好多香港過氣政治人物，建制派政客、官商巨賈都叫你啲香港人，對民主唔好咁多要求，有得你選就「袋住先」。仲氹你話你依家「袋住先」，將來仲有機會改o架！吓？之後有冇得改就未知，但係廣東話有句諺語叫「財到光棍手，一去冇回頭」。
全港大專生發起一連五日嘅罷課，抗議人大常委會喺八月三十一日就二○一七特首普選訂下嘅框架。眾所周知人大嘅框架等同向民主落閘，完全粉碎咗香港人對真正民主嘅憧憬。今次學生罷課，亦係香港學運史上一次最大規模嘅行動。年輕學子走在社會最前線，為理想付出，勇敢爭取，實在係社會之福。大人們當然可以譏笑呢班學生，理想主義有書唔讀喺度發白日夢。因為查實好多大人已經被地產霸權、生活壓力、政治壟斷、酒色財氣扭曲成不似人形，所謂夢想已經埋葬喺石屎森林嘅地基底下，無夢想到同條鹹魚無分別，每日只係行屍走肉，做大財團嘅奴隸。佢哋被剝削而不自知，仲覺得自己活得很好，自己係條死魚仲要逼年輕一代將來加入鹹魚同盟？無錯，罷課抗爭可能無用，但總比乜都唔做，最後摺埋自然死好得多。一個人點肚餓都唔會食毒藥充飢。政改，點可以「袋住先」？
「袋住先」簡直等同寶藥黨嘅甜言蜜語，只能用嚟呃阿婆。唔係咩？你睇中聯辦主任張曉明講到一個伊朗式嘅普選為「精品」、「靚女」，明明你A貨當真嘢賣，淨係呢樣都已經知道呢個落閘方案絕對信唔過。「袋住先」呢句嘢，直情可以引伸為「世紀老千局」，要你將啲假銀紙「袋住先」。
罷課之後會發生啲乜？冇人知。但係我只知道如果香港人今鋪乜都唔做，認命認輸「袋住先」，只會禍延子孫，世世代代永不超生！
