政壇：搞搞政：摩天輪似電鋸 一旦轉動「煞」港府?
位於中環海濱嘅巨型摩天輪下月中就試業，雖然歌仔唱「幸福摩天輪」，但政圈近日流傳，呢座摩天輪外形好似電鋸齒輪咁充滿煞氣，「鋸齒」一旦運作仲會「煞」向鄰近嘅添馬艦政府總部同特首辦公室，好唔吉利喎！堪輿學家批算，摩天輪形似不斷滾動嘅圓形，破壞代表權力及長官嘅乾位，梁班子以至整個政府可能有影響。
設計圖片
摩天輪位近門常開等政府建築重地，有說「齒輪」就好似鋸向港府心臟地帶。
李丞責實地批算後，指巨型摩天輪破壞乾位，不利政府。
高達六十米嘅巨型摩天輪有四十二個車廂，最快十月中試業，但摩天輪位近特首辦、政府總部及立法會三大權力核心，由對岸望過去，「齒輪」就好似鋸向港府心臟地帶，事關香港未來福祉，我哋即刻請堪輿學家李丞責實地視察、批算一下。李丞責攞住羅庚話，摩天輪位於特首辦西北位，西北位為乾位，代表權力及長官，最啱擺座高聳、穩健嘅建築物幫助得權。可惜摩天輪本身唔係固定建築物，仲係呈不斷轉動嘅圓體，咁就會破壞乾位。加上特首辦西北位有工地，更易有血光、災難同爭吵，通通都對政府不利喎！
政總加圍欄「是非必然」
李丞責仲話，衙門或施政地方喺風水學上要坐北向南，背靠北斗就最好，但依家特首辦坐南向北，加上門前對正維港，維港屬流動海水，仲易令權力不穩。除咗摩天輪呢座「外部勢力」，政總東翼對開近日仲加建圍欄，李丞責形容政總依家屬「囚困之象」，皆因門前築起圍欄即進氣受阻，加上圍欄狀似刀劍，所謂「門前刀劍，口舌必多，干戈門前，是非必然」，難怪香港家衰口不停喇。不過，風水信則有、不信則無，高官切忌迷信。
