政壇：廣播處長招聘仍免大學學歷
現任廣播處長係政務官鄧忍光，依慣例佢將「三年一調」，係時候要轉位。港台早前成立晉升委員會，都係覺得副廣播處長戴健文唔合適，所以最終都係要好似以前咁，尋日正式公布透過公開招聘請人。
睇番今次聘用條款，其實同一○年一樣，都係要具備最少十五年傳媒業及高層經驗，如果政府內部有首長級第二級（D2）公務員有興趣，都可以申請，截止日期為十月二十四日。
睇番○七年公開招聘，曾經因為改過招聘條款，由需要大學學歷變成只要有十五年傳媒經驗就得，結果畀人批評係為「某人」「度身訂造」。最終「某人」分別喺○七年及一○年都落選，唔知係咪怕食第三次「檸檬」，早前佢就講到明冇興趣再申請嘞。不過，如果政府真係好想搵佢嚟做，不妨可以加入「曾經領導反佔領中環運動」、「曾經發動反罷課熱線」呢啲聘用條件，相信佢肯定雀屏中選！
