政壇：李垂誼獲賞識天價古琴會知音
著名大提琴家李垂誼（Trey）繼去年搞音樂節後，十一月底又會舉行一連三場音樂盛會同社區音樂會，參演嘅頂尖音樂家多達三十三位。今次Trey仲會出動古董大提琴，雖然個琴無貼金、無鑲鑽，但系出名門，身價高達千萬港元，名家配古琴，真係令人期待。
李垂誼手上嘅古董大提琴音質超凡，令佢演奏時分外得心應手。
Trey尋日同垂誼樂社理事會主席蔡關穎琴以及一眾知名音樂家做宣傳。Trey一話開騷，俄羅斯國寶級音樂家、中提琴大師及指揮尤利‧巴舒密特都答應同台演出，Trey自己就率領八位嚟自唔同地方嘅音樂家，包括香港鋼琴家李嘉齡同張緯晴等，演奏多首激動人心作品。演奏功力深厚嘅Trey有個秘密武器，就係一個跟隨咗佢兩年幾嘅古董大提琴，呢個琴係十九世紀由意大利琴師Goffriller製造，全球只有六十個。Trey手上的琴，曾由法國貴族Gabriac收藏，輾轉流傳到一位收藏家手上，因為賞識Trey嘅才華，慷慨借出一用。
尋日記者會上，Trey就用呢個琴同香港中樂團特約琵琶樂手邵珮儀合奏一曲《天緣》，中西合璧，好比天籟之音。
