政壇：政總飯堂Last Day墟冚
金鐘政府總部飯堂因為投唔到標，做到尋日下晝四點鐘正式結業。尋日一早睇吓，飯堂較以往多咗人排隊買餐，仲有多名副局長同政治助理捧場，一班侍應都做到踢晒腳。財經事務及庫務局政助趙必立、局長新聞秘書及政務助理都齊齊現身，而財政司司長政治助理羅永聰都去買外賣。
陳岳鵬晨早落政總餐廳食「最後早餐」。
政府總部餐廳員工食告別午餐。
政制及內地事務局副局長劉江華就單拖一邊食早餐、一邊睇新聞。政制及內地事務局政助陳岳鵬（Ronald）就比上司劉江華更早現身歎早餐，佢評價以位置、價錢同食物質素嚟講，飯堂都算可以，尤其炸雞髀係全隻炸，煮法最傳統喎，所以佢都關心新飯堂供應商質素好唔好。Ronald又呻附近中信大廈快餐店都裝修，嚟緊呢一個月，或者要早到十二點就出去買飯，否則就要同私人寫字樓打工仔「爭飯食」，隨時要排隊排半粒鐘都唔定。
餐廳老闆李先生話，尋日營業額有五位數字，比平日多啲，佢之前講到明最後一日嘅收益會同員工分享，所以年資高嘅員工，都可以分到兩千多元。
