政壇：江碧蕙投入「雙職女性」生活

城中好多雙職女性，既要顧事業，又要顧家庭，一啲都唔容易，名媛江碧蕙（Sherie）婚後就變身雙職婦女，日前佢由法國返港出席好朋友嘅攝影展，聽佢講近排嘅生活，明顯對呢個角色好投入。

江碧蕙專程由法國飛回香港出席朋友的攝影展。

Sherie話，佢啱啱接咗個美容廣告，為求效果理想，自己都調節生活，譬如要早睡早起，仲要勤做運動添：「喺法國時，我一星期會打兩次Golf，其實做家務都係一種運動，哈哈……」好多人視家務為苦差，但佢就視為運動，可見幾投入。

講到好朋友嘅攝影展，佢就對朋友嘅攝影技巧讚譽有加，話對方嘅作品能夠完美捕捉人物嘅神髓同味道喎。