肥佬黎離開中醫診所後，一臉落寞咁返回停車場坐座駕離開。
壹傳媒老闆肥佬黎，自從七月底被揭向泛民主派秘密捐款逾四千萬元後，隨即被全城圍剿，更先後兩次接受廉政公署調查。肥佬黎未知係咪知大禍臨頭，繼早前自爆近期飽受失眠困擾，尋日仲付諸行動親赴大埔睇中醫接受治療，全程更係心事重重兼頭耷耷，一臉落寞，面如死灰。
尋日下晝約六點，忽然棄戴鴨嘴帽嘅肥佬黎，由司機接載去大埔廣場一間中醫診所，據佢早前喺旗下雜誌撰文，透露過「佔領中環」行動發起人之一嘅陳健民介紹佢去大埔睇中醫，相信講緊嘅就係呢一間診所。肥佬黎逗留約半小時後，就繼續頭耷耷攞住一袋疑似係藥嘅嘢返回座駕，由司機載返何文田寓所。
自爆啪藥都瞓唔着
肥佬黎上兩個星期撰文，先寫自己「半夜敲門也不怕」，無懼廉署調查，但隨即又自爆最近兩個月食埋安眠藥都瞓唔着，形容失眠帶畀佢精神同心理上嘅痛苦太難受喎。梗係啦，佢有單政治捐款醜聞纏身，被廉署人員上門搜查，又要親身去廉署受查，唔失眠就奇喇！
第一手消息請下載on.cc東網
