政壇：傻強 Greg蘇趁佔中齊攤抖
距離「十一」仲有幾日，佔中搞手事先張揚要喺當日擺盛宴，嗌人「去飲」，搞到中區大小商舖都緊張起來，各自制訂應變計劃，政府方面，保安局同警方、甚至懲教署都做定準備，不過，有人緊張，亦有人淡定應對，政府尋日刊憲，公布財經事務及庫務局局長陳家強（傻強）同商務及經濟發展局局長蘇錦樑（Greg蘇），會喺「十一」後放假，佢哋不約而同揀咗人哋「去飲」後抖吓，究竟係冇眼睇定係根本未驚過？
設計圖片及對白
十月唔放 嚟緊冇得抖
佔中搞手近期頻做宣傳，反佔中嘅團體都唔示弱，提早為商戶提供協助，想減少佔中嘅傷害，各方睇到實嘅時候，憲報卻披露，傻強會喺十月三日放一日假，由於之前嘅兩日都係紅色公眾假，加加埋埋，佢即係可以抖三日；Greg蘇就由十月二日開始攞假，放到十月四日，多傻強一日。佢哋兩個都係問責官員，一個主管財經事務，一個主管商務及旅遊，竟然齊齊喺佔中來臨後放假，雖然只係抖一兩日，但就畀外間好多聯想。
冇耐前金融界、交易所甚至金管局、證監部門都要做演習，確保佔中發生時，香港嘅金融交易一切運作暢順，依家佔中殺到嚟，傻強卻喺佔中活動後第一個交易日放假，咁淡定，唔通財經局內部有晒評估，最少唔驚佔中搞出大件事，影響金融中心運作？至於Greg蘇，佢亦睇住商業及旅遊業兩大瓣，淡定放假係咪因為同樣樂觀呢？
不過，知情人士話，立法會十月初就復會，之後政府又有連串大政策，年尾又要為預算案忙，政策局嘅工作將會排山倒海而來，官員想放假，都只係得呢幾日咋，或者係咁，傻強同Greg蘇咪趁中環被佔領，齊齊抖吓囉。
