客似雲來,車水馬龍,本來係好事,但如果客人太多而搞到應接不暇,七國咁亂,咁就隨時好事變壞事嘅喇。

呢,九龍城碼頭附近設有多個旅行團專用食肆及店舖,經常有大量旅遊巴上落客,令居民備受困擾,尤其係傍晚「維港遊」時段,碼頭公眾停車場更加係水洩不通,旅遊巴大排長龍,既阻塞交通,亦阻礙巴士進出站,司機不停響號,嘈喧巴閉,居民終日不得安寧,怨聲載道。

好哋哋嘅碼頭點解會搞成咁?講起咪又係港產官僚好帶挈囉。有區議員踢爆,附近一帶本來就唔夠車位,加上旅行團愈來愈多,旅遊巴大量湧入,交通根本負荷唔到。其實旅遊業界早就建議當局開放附近嘅土瓜灣驗車中心或者臨時政府空地,供旅遊巴停泊,點知運輸署一味耍太極,聲稱未完成諮詢工作喎。

唔使問阿貴,所謂嘅諮詢無非又係玩拖字訣啫,旅遊巴愈來愈多,由於車位嚴重不足,違泊問題早已存在,而且唔止九龍城碼頭係咁,好多地方都係咁,當局幾時有諗辦法解決呢?早排有市民向本報投訴,每次坐巴士經過尖沙咀漆咸道南都被旅遊巴重重圍困,因為埋唔到站,乘客焗住要喺馬路中間落車,險象環生。另一個旅遊熱點香港仔亦唔好得去邊,由於近年區內大量開設專門招呼旅行團嘅食肆及酒店,導致道路水洩不通,居民飽受交通擠塞同噪音困擾。

旅巴違泊問題究竟有幾嚴重?二○一一年八月至今年七月期間,警方共接獲超過一千五百宗相關投訴,發出過萬張「牛肉乾」,你都咪話唔誇張。話時話,呢個數字只係冰山一角咋,實際情況可能仲嚴重得多添吖。

講開又講,隨着訪港內地客不斷增加,亂象愈來愈多,旅遊巴違泊問題只係其中之一咋。試諗吓,訪港內地客由十年前嘅千幾萬人次增至舊年嘅四千幾萬人次,而相關旅遊設施幾乎冇增加到,又點可能唔七國咁亂呢?近年兩地居民衝突無日無之,中港矛盾不斷惡化,罪魁禍首就係港產官僚,佢哋一味坐享其成,翹埋雙手乜都唔做,連增加旅遊巴泊位都唔肯,問你服未。

嗱,國家領導人日前已經開到聲,如果個人遊有礙香港,中央完全可以改變。睇嚟內地旅客遲早對香港避之則吉,到時無人上門,睇旅遊業仲點樣撐落去,叮!

第一手消息請下載on.cc東網iPhone/iPad/Android/Windows Phone Apps