SUN焦點：為湊子女願犧牲 全職爸爸站起來
餵奶、換片、湊返學、接放學、掃地抹屋，原來並非媽媽專利，近年本港興起一班全職爸爸，與傳統相悖，代替妻子肩負育兒重任，反而妻子則外出工作，搏殺搵錢養家。統計處數據顯示，男性料理家務者在二十二年間激增四倍，由一九九一年的三千多人，增加至去年約一萬五千人。專家指，本港服務業蓬勃，女性求職較男性容易，造就全職爸爸興起。
統計處數字顯示，男性料理家務者的人數上升。
為了陪伴子女成長，Wing兩年前辭工，做全職爸爸。
每天定時為兒子換尿片是Wing的工作之一。
當女兒要參加遊戲班時，Wing亦要負責接送。
文正康於五年前開始全職爸爸生涯。
時移勢易
梁先生（文職）：依家仲邊會有男人要有錢過女人呢啲舊概念，所以我接受到老婆人工高過我。
陳小姐（行政）：如果大家傾好咗，我唔覺得有問題，因為每個人都有責任，喺屋企都有照顧家人同做家務嘅責任，唔可以話老婆養老公咁難聽。
根據統計處最新數據顯示，肩負家庭責任的男性料理家務者於一九九一年，只有三千多人，○九年升至一萬三千人，去年已升至約一萬五千人，二十二年間數目激增四倍。曾任職會計師、數據分析員的Wing，育有兩子女，擔任全職爸爸兩年。「由我照顧小朋友，係同太太商量後嘅決定，大女出生第一年，太太辭工後全職照顧女兒，但我工作時間較長，放工後陪伴家人的時間有限，所以決定兩人互換身份。」由加拿大回流返港的他沒有傳統男士的負累，「太太做醫生，可以返半日工，而我哋又唔係要好好嘅物質生活，所以寧願一家多啲時間相處。」
擔任全職爸爸的工作並不簡單，接送長女參加遊戲活動，為幼子餵奶換片，都由自己一手包辦，日子有功，過程中沒有雞手鴨腳，父親也可以應付母親的工作。Wing打算三年後，待幼子長大，才重投勞動市場。不過他亦坦言擔心競爭力下降，「係要犧牲，但睇住小朋友成長好重要，我哋唔想睇到仔女黐住工人姐姐多過我哋。」傳統住家男常帶有負面形象，Wing指親友十分支持，「雙方父母都無質疑我哋的決定，而身邊的朋友仲好支持我，只係擔心我做全職爸爸慣唔慣。」
「唔應該外判畀外傭」
曾任社工及資訊科技業的文正康，五年前因為兒子，亦開始做全職爸爸，「當時自己想轉工，咁啱仔仔又出世，就辭咗份工，喺屋企全力照顧佢。」現時，他兼職主持育兒講座，但打算五年後，才找全職工作，全因不想錯過陪伴愛兒成長的黃金十年，「照顧子女係父母的責任，唔應該外判畀外傭，佢哋只會照顧小朋友，而唔係教小朋友。」
剛開始做全職爸爸時，親屬說話少不免對他構成一定壓力，「佢哋會問我做緊咩嘢工作，我阿媽就想我有穩定收入，成日都直接或間接咁叫我去搵份全職做。」來自街坊的眼光亦不好受，「接送兒子返學時，其他家長都係媽媽，都會有啲尷尬。」反而任職教師的妻子則全力支持，「我老婆好支持我，佢可以做自己鍾意嘅工作，而我就幫手照顧小朋友。」
壓力較全職媽媽大
中原人力資源顧問董事總經理周綺萍表示，本港金融服務業蓬勃，而女性細心、溝通能力強，適合前線服務業，因此，女性於中基層職位較男性有優勢。另外，現時管理層雖仍由男性主導，但近年已愈來愈多女性獲得管理層席位，「女性要進入高層，一定要付出更多，爭取好表現，所以無咁容易為家庭而放棄事業。」
明愛男士成長中心督導主任黎偉倫表示，傳統觀念底下，全職爸爸面對社會與經濟的多方面壓力，較全職媽媽更難擔任，曾有人因受不住親友閒言，放棄擔當全職爸爸，「有位全職爸爸，本來係中醫師，但放棄工作，喺屋企照顧子女，但後來親戚不斷畀壓力佢，問佢點解唔去返工，最後惟有選擇放棄。」另外，全職爸爸與伴侶必須有良好溝通，否則易生衝突。社會福利署發言人表示，家庭是對兒童成長最好及最自然的地方，從幼兒福祉的角度考慮，應盡量由家人照顧。若家庭有任何福利需要，可與社工聯絡，商討一套完善的兒童照顧方案。
