城中鏡：馬雲發達 張茵擬購股支持

阿里上市令馬雲登上中國首富，對張茵財富排名唔多唔少都有影響。張茵見到馬雲發達都咁開心，原來係因為網購同電商發展，與包裝行業發展有直接關係。張茵話舊年度玖紙來自網購相關嘅銷售達百分之十，咁正好反映喺資訊化時代，網購同電商發展可帶旺包裝行業。由於睇好電商行業發展，佢亦考慮自掏腰包，入市購買阿里股票。

馬雲經常強調阿里對內地貿易發展嘅推動作用，就連產能過盛嘅鋼鐵行業，原來亦要透過阿里尋求海外銷售出路。唐山東華鋼鐵管理層日前就向外電表示，為免要將大量產品蝕本內銷，公司正積極透過阿里嘅B2B網站，打開國際市場銷售。