股神巴菲特投資都會「中伏」，英國超市「一哥」Tesco之前爆發會計醜聞，搞到股價今年跌幅迅速擴大至最多百分之四十三，連累持有Tesco百分之四股權、位列第三大股東嘅股神投資旗艦巴郡，帳面勁蝕差唔多七點五億美元（約五十八點五億港元）！其實股神舊年見Tesco業績麻麻，早喺十月份大手沽出手持其中五分一股份，市值三億英鎊，但估唔到Tesco今年生意仍無乜起色。

股神巴菲特投資英國超市「一哥」Tesco，最近錄得巨額虧損。（資料圖片）

股神向來為食，除咗長線持有一啲價值型的金融股好似富國銀行外，日常生活消費以至飲飲食食嘅股份都有涉獵，據知，股神由○六年二月首次入股Tesco至今九年，期間增持多過減持，總共用咗十七億美元。

至於Tesco之所以獲股神垂青，大抵係因為當年Tesco能夠成功進軍美國市場，喺南加州開設首家超級市場，成功打破英國零售商難以在美國立足嘅魔咒，令到巴菲特刮目相看有關。

奈何公司今年諸事不順，英國報章尋日仲報道，Tesco原本十一月準備在英國本土新開嘅巨無霸超市亦都要無限期押後，睇嚟股神持股價值仲有排跌。

評級機構標普禮拜三警告，萬一會計醜聞嘅調查結果，驅使佢將Tesco企業管治評級調低至「水皮」，可能將Tesco信貸評級貶為「垃圾」。

不過，英超球隊紐卡素嘅班主艾殊利驚都未驚過，見到Tesco股價跌到十一年低位，即刻透過佢打骰嘅英國最大體育用品零售商Sports Direct，豪擲約七千萬美元低吸「博反彈」。

第一手消息請下載on.cc東網iPhone/iPad/Android/Windows Phone Apps