城中鏡：金刀梁掃零食撐傷健
由傷殘人士負責營運嘅一間迷你超市尋日進軍香港大學校園，成為全港第一間殺入大學嘅超市。港大校務委員會主席「金刀梁」梁智鴻、四洲集團主席兼「零食大王」戴德豐等名人齊去撐場。咪以為做醫生實好注重飲食健康，本身係泌尿科名醫嘅金刀梁喺開幕後盡情掃貨，話咁快就掃咗一大袋紫菜、餅乾等零食，真係估佢唔到。
梁智鴻（右）見到導盲犬咁溫馴，忍唔住要合照。
戴德豐自詡同超市一樣咁有活力。
葉文娟（右）對售賣嘅盆栽好有興趣。
成日晒自己已經攞長者卡的金刀梁，為超市揭幕後就好精靈咁喺超市行番轉，期間見到零食就係咁攞，眨吓眼即掃咗一百四十蚊零食，夠晒撐場。見佢拎張一千蚊紙出嚟找數，但超市啱啱開張唔夠錢找，金刀梁先至摷散紙畀咋。
戴德豐係呢間活力超市嘅主要供應商之一，但係佢貴人事忙，開幕禮未完就有事走先。佢致辭時話自己同超市一樣咁有活力，事關佢由二十二歲開始創業，做到依家六十五歲都未停過喎！
葉文娟發揮生意頭腦
現場有人帶同一隻導盲犬到場，結果引起一陣騷動，包括金刀梁、社會福利署署長葉文娟都爭住同隻狗影相。葉文娟都好有生意頭腦，佢同店員講要將雜誌架放喺近門口嘅地方，市民行過揭吓揭吓就會買番本喇！冇耐佢喺賣盆栽嘅貨架停留咗一陣，原來佢秘書前排買咗盆放喺辦公室，葉文娟見幾靚，所以心郁郁想買番盆送畀人，可惜個手袋唔跟身，惟有下次先喇！
