政壇：搞搞政：立會主席熱門接班人各有考慮

首個熱門人選係行政會議成員葉劉淑儀，佢係立會內少數同時擁有行政立法經驗嘅議員，曾於官場打滾多時，一度出任要處理極多機密資料嘅保安局局長一職，加上同公務員團體關係良好，係政府信得過之人。不過，眾所周知，葉劉志不在立會主席一職，有意於政壇更上一層樓，預料呢個將會係接任主席嘅最大變數。

另一可能人選係政制事務委員會主席譚耀宗，佢係立會內資深議員之一，有足夠江湖地位去應對各種政治挑戰，唯一最大問題係佢退意甚濃，即使有黨內兄弟獻計建議佢轉換跑道，由現時循新界西參選轉戰俗稱「超級區議會」嘅區議會第二功能界別，但呢個方案對建制派無着數，且損人不利己，可能打亂其他建制派嘅部署。譚耀宗如果連議員都唔係，出任立會主席更係無從說起。

第三個係內務委員會主席梁君彥，雖與泛民打交道有一手，但最大阻力係佢非根正苗紅，加上本身係工業界功能界別議員，或者可能會成為泛民攻擊嘅把柄；再者事不離實，佢嘅上手、內會前主席劉健儀也一度同立會主席無限接近，最終都係大熱倒灶，歷史包袱或成佢上位嘅最大障礙。

不過，距離一六年立會主席接班仍有兩年多，建制派以上三人誰人可以笑到最後，仍然變數多多。