股市早排愈升愈有,但近排又玩變臉,接連跌破幾個心理關口,究竟發生乜嘢事?證券學會會長李細燕尋日出席一間星級食府開幕式時,記者趁機問吓佢意見,佢就話呢波跌市係因為佔中喎!不過話口未完,佢又話仍然睇好港股後市,因為允許內地散戶投資港股嘅滬港通即將推出。咁又係,大把北水即將南調,港股想跌都唔易。

李細燕(左)現身為仇詩傑(右)食肆新店開張撐場。

本身做證券業嘅平和國際集團主席仇詩傑,早幾年開始撈過界開埋食肆,炒完股票炒小菜,結果愈做愈順景,眨吓眼已有十間分店。佢尋日出席全港最大一間分店嘅開張儀式時,更透露打算喺明年將食肆上市添!難怪原本各有發展嘅囡囡仇曼瑩及囝囝仇祖薰,都返嚟幫爸爸手做品牌推廣及營運管理。飲食業界成日呻香港租金貴、人工高,其實只要搵啱條路,仲有大把機會嘅。

第一手消息請下載on.cc東網iPhone/iPad/Android/Windows Phone Apps