各個政黨正密鑼緊鼓為新一屆區議會選舉進行部署,而選舉管理委員會早前公布區議會選舉選區劃界建議,除咗調整部分選區劃界外,仲新增十九個新選區,當中西貢區就增加軍寶、都善同環保北三個選區,全部位於將軍澳區。

設計圖片

據聞,近年因為反擴大堆填區出位嘅西貢區議員「哪吒」方國珊,除咗想將本屬自己選區範圍內嘅環保北據為己有外,仲想搶埋附近嘅軍寶區,不過建仔同泛民兩黨都唔想放棄呢舊肥豬肉,令一個小小嘅選區演變成四方之爭。

白鴿黨新同盟爆爭拗

據地區中人透露,哪吒早已對呢個新選區虎視眈眈,仲派出一個姓黃嘅律師頻頻落區做嘢,擺明係想擴張區內勢力範圍。不過,建制派第一大黨建仔亦已經周圍物色人選落區同哪吒盟友對撼,費事畀哪吒攞多一個區。

眾所周知,范國威喺退出白鴿黨後另起爐灶成立新民主同盟,仲成功進身立法會,暫時仲係一人黨,所以新同盟亦銳意擴大政治版圖,不但要搵位出,仲要搵多啲地區樁腳嚟加大政治本錢,咁就難免會同其他泛民政黨有衝突,而喺今次區議會選舉當中,新同盟同白鴿黨都有意染指該區,兩黨原本喺民主動力嘅泛民協調會議時各不相讓,最後新同盟抽籤成功,可以優先派人出選該區。

不過,有白鴿黨中人就唔滿意呢個安排,話抽籤一向唔喺協調機制之內,要求民主動力重新召開會議討論軍寶呢區畀邊個。呢個新選區竟然吸引到四方覬覦,睇嚟各黨都始料不及。

第一手消息請下載on.cc東網iPhone/iPad/Android/Windows Phone Apps