垃圾徵費爭議大 三堆一爐勢跪低
港府密鑼緊鼓推行垃圾徵費計劃，究竟點樣徵費呢？據講當局傾向按戶按量收費喎。其實講嚟講去，無非都係想將個波拋畀市民啫，港產官僚搞環保永遠有姿勢無實際，所謂源頭減廢，到頭來可能又係得個講字嘅咋。
係咁嘅，可持續發展委員會尋日開會討論垃圾徵費模式，同意落實按戶按量收費嘅大方向，但具體細節仍有待討論。該會主席陳智思係咁講嘅，部分大型屋苑未必能即時做到按戶收費，委員會將討論過渡安排，下個月將建議報告提交政府。
正所謂，差之毫釐，謬之千里，咪以為按戶或按幢收費冇乜分別吖，效果可以相差好遠o架。正如環保團體話齋，按戶收費有直接經濟誘因，住戶唔想畀咁多垃圾費，自然會減少垃圾；反觀按幢徵費，因為由所有住戶攤分，經濟誘因大減，垃圾量隨時不減反增。
嗱，本報記者日前到其中一個參與垃圾徵費試點計劃嘅屋苑睇過，由於管理處有免費垃圾袋派發，根本冇住戶肯花錢購買專用垃圾袋，結果垃圾量並冇減少，證明冇直接經濟誘因之下，難以達到源頭減廢嘅效果。反觀另一屋苑，因為管理處堅持住戶必須自掏腰包購買專用垃圾袋，結果垃圾量比以前減少半成不特止，環保回收量仲增加一至兩成添。由此可見，除非唔收錢，否則按戶收費睇怕都走唔甩嘅喇。
即係咁，保護環境，人人有責，多數市民願意為環保出一分力，大前提係必須合情合理，如果收錢之後仍然解除唔到垃圾圍城嘅危機，咁就嘥氣喇。再講吖，就算垃圾徵費真係可以達到源頭減廢嘅效果，亦唔表示一天都光晒，現時本港每日產生固體垃圾多達一萬三千噸，落實徵費措施後亦冇可能令所有垃圾消失，始終都要諗辦法解決。
係人都知，本港一直靠堆填處理垃圾，問題係三個堆填區幾年後就會陸續爆滿，你話點算好呢？面對迫在眉睫嘅垃圾圍城危機，港府無計可施，一味硬銷三堆一爐方案，結果受到地區人士強烈反對，加上行政立法關係惡劣，議員郁吓就拉布，郁吓就流會，三堆一爐要過關，簡直難過登天。
講到底，垃圾問題積重難返，皆因港府缺乏長遠規劃，唔係得過且過，就係見步行步，依家先至臨急抱佛腳，硬銷三堆一爐，又點會唔引起市民怨聲載道吖，叮！
