某台灣書店喺香港落腳後，新加坡的書店亦會大展拳腳，喺尖沙咀開設三萬多呎嘅大書店。

現今，全球閱讀模式，只看手機，連在電腦個「芒」睇書也算是個怪物的新紀元，開書店、賣紙本實體書，不只是個黃昏行業，其實，是「死亡之旅」。

世界各地的實體書店，再不純粹賣書，而係販賣生活態度，早年，有書店加設咖啡corner，讓人悠閒閱讀，亦兼賣埋文具，甚或音樂產品來維生，繼而，有小型精品，如水晶擺設、生日卡出售，後來，還有T恤、披肩等布料貨品；家陣，已發展到老奉的賣茶葉和番梘、皮革銀包仔不特止，仲有成件皮褸咁賣……已不務正業矣！

台灣書店旗艦店，賣書面積唔知有無五分一，其餘面積已係家居用具為主了！大佬，連電飯煲都有得賣呀！那「書店」只是寄居在一家百貨公司內咋！

如此一家書店，根本就係一個「二店東」的地產項目，分租畀人賣雜貨的面積不斷擴張，擺書的地方日漸收縮，稱呢啲舖頭做「書店」，是侮辱了書！

至於新加坡書店揚言話新店，不只賣書，仲有西餐廳和麵包舖，更賣埋香薰及家具，個經營概念係藉多樣化產品，「吸引顧客行書店」喎！唉！你話書業幾悲哀吖！

話唔埋，將來有日，砵蘭街啲「撳鐘仔」房內都放滿世界名著，等人幫襯時一沾閱讀氣氛，咁唔死有乜用吖？

書店再不以書為主，就即如牛丸無牛肉一樣，這就叫做新模式經營矣！我接受唔到囉！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps