貿發局主席蘇澤光（右）送咗本圖片集畀林天福，記載佢喺貿發局工作嘅點滴。
貿發局總裁Fred林天福十月一日過檔機管局任行政總裁，尋日貿發局搞咗個大型酒會，歡送呢位服務咗貿發局二十八年、期間擔任總裁達十年嘅「老員工」，到場仲有過百名中小企老闆。
今年五十六歲嘅阿Fred提到自己半世人打貿發局一份工，要離開好唔捨得。雖唔肯多講「燙手山芋」機管局，但就話首日返工雖然係公眾假期，但已計劃去機場視察，只係擔心自己搭錯車去咗會展返工。
阿Fred話從無諗轉工，但有想過退休，遇上機管局呢個機會，話自己電池仲有電，可以服務香港。過檔另一原因係覺得機構換領導人係好事，發展會更健康。對於有人質疑佢冇航空業經驗，佢回應話過去三任機管局行政總裁，其中兩任都無相關背景，更引用阿里集團主席馬雲入股恒大足球隊時講「外行可以領導內行，但必須尊重內行」。
明年接任機管局主席嘅貿發局主席蘇澤光喺酒會致辭時，笑言好開心阿Fred先去機管局打點好，最好先學好叫啲海豚游開啲，仲要籌多少少錢，應付興建第三條跑道，仲要唔好超支和超時，呢樣就要參考吓港鐵喎，全場即時爆笑。
第一手消息請下載on.cc東網
