政壇：廠商會青委為特殊童送暖
中華廠商聯合會一眾青委會成員，早前資助東華三院徐展堂學校一班智障同特殊兒童夢想成真，去迪士尼樂園歡度一天。青委副主席Celia王詩雅同東華總理李曠怡牽頭搞呢次同樂日，十多位青委成員包括張永鴻、翁國豪、羅程剛同徐詠琳齊支持。
王詩雅（右二）同細佬王智誠（右一）齊做義工，帶住班智障及特殊兒童玩轉迪士尼。
當日天氣有啲悶熱，但有得去樂園，班細路點熱都唔驚。眾人中午抵達迪士尼後，先食個快餐醫肚，充完電就飛奔排隊玩各項機動遊戲，人氣度極高嘅過山車、旋轉木馬同3D米奇米騷，係必玩項目。話咁快，大家就打成一片。
Celia形容班小朋友好熱情，雖然語言表達能力唔強，卻不時主動幫班青委抹汗，又送上親吻。翁國豪就讚佢哋好大膽，初次玩過山車不但無尖叫，仲反過來安慰班青委話「哥哥，唔使驚，我喺度」，場面溫馨。臨走時，班小朋友扁晒嘴話唔捨得分手。Celia話聖誕節會去院舍開派對，唱歌畀班小朋友聽都未定喎。
