政壇：傳奇跑手觸動張樹槐
《Unbroken》呢部小說，電影版本呢個聖誕就上映，執導嘅仲係荷里活著名女星Angelina Jolie，身為基督徒同熱衷於馬拉松嘅恒生銀行傳訊及企業可持續發展總監Walter張樹槐，對小說主角路易（Louis Zamperini）嘅敬佩不限於佢嘅跑步成就，而係佢逆境求生嘅無限勇氣、對信仰嘅堅持，以及超越常人嘅寬恕心。既然咁觸動Walter，佢就寫咗篇文章喺網上發表。
張樹槐對小說主角路易嘅故事感受好深。（資料圖片）
路易細個係小偷，跑得快到畀人睇中做奧運跑手，佢參加一九三六年德國奧運，雖然冇金牌，但標青到畀希特拉激讚，一九四○年東京奧運會遇着二次大戰，佢就同奧運擦身而過，冇緣爭金。之後做咗戰俘，更不幸就係畀營中最兇殘嘅軍人渡邊睦弘盯上，之後下場慘到不得了。
戰後路易自由了，佢憑跑步同信仰，戰勝怨恨。Walter對路易嘅故事感受好深，有跑步同信仰元素，難怪佢幫老友個網寫文章，第一篇就揀咗呢個題材。呢位曾係美國尚存年紀最大嘅奧運會賽跑選手，喺今年七月初以九十七歲高齡逝世，一生故事實在好inspiring。
