設計圖片及對白
喺泛民主派當中，社民連「長毛」梁國雄同人民力量等激進勢力近年抬頭，連白鴿黨都屢次被激進派騎劫，搞到成個泛民路線愈走愈激，同九十年代嘅「又傾又砌」路線相比，真係天淵之別。最近有傳全體立法會議員有機會獲邀到廣東考察，泛民普遍反應非常抗拒。但有兩隻黨齡極深嘅老鴿，近日竟不約而同暗批激進泛民，認為泛民缺乏溝通路線只會陷入困局。
泛民議員個個都話唔想去廣東之旅，無做議員好耐嘅老鴿「肥仔明」李華明尋日突然開腔。話泛民如果因為「內地」事務而「落閘」，其實有違作為民意代表，佢仲好寸嘴話一個成熟政黨唔應該咁做，要知所進退至得，唔可以當全國人大常委會決定唔存在。肥仔明咁講，猶如兜巴摑落泛民身上，唔知白鴿黨主席劉慧卿點睇？
憂流失溫和派支持票
除咗肥仔明呢隻老鴿，另一位發火老鴿就係Dick狄志遠，阿Dick呢兩日以香港家庭教育學院總監身份接受唔同媒體訪問，都話大學生搞罷課可以理解，不過中學生就未夠成熟作出判斷，亦容易令家長擔心，加上罷課影響學業，認為中學生唔適合罷課喎。兩年前阿Dick已因反國教事件同白鴿黨高層唱反調而吵大鑊，依家又反對中學罷課，似乎阿Dick對班激進派，真係好不滿。
講起泛民，阿Dick更加唔留情面批評，完全好似唔記得自己仲係白鴿黨黨員。佢話泛民愈激進，但一定唔夠激進派激，最終只會連溫和派支持都慢慢流失。嘩，兩隻老鴿突然跳出嚟明踩暗寸泛民唔夠成熟，兩人同樣係匯點派出身，又係政改民意關注組成員，難道匯點派想重整旗鼓有一番作為？
第一手消息請下載on.cc東網
