危險招牌高高掛 都市炸彈危危乎
八號風球「海鷗」日前襲港，市民過咗一個風雨飄搖嘅晚上，好彩冇乜意外發生。不過咁，一次好彩唔等於次次都咁好彩，睇見街頭招牌被風吹到搖搖欲墜，險象環生，簡直令人步步驚心，呢啲遍布全港嘅都市炸彈唔拆除，遲早搞出人命嘅咋。
嗱，現時全港最少有十二萬個違例招牌，梗有一個喺左近，唔少招牌日久失修，甩皮甩骨，睇見都牙煙。屋宇署可能知衰啩，去年九月實施「自願招牌檢核計劃」亡羊補牢，只要招牌業主提交證明書證明招牌安全，即使未經審批嘅招牌都可以保留，其後每五年重新核證。呢個計劃原意係唔錯嘅，可惜港產官僚做嘢求求其其，閉門造車，結果荒腔走板，形同虛設。
即係咁，計劃推出後反應冷淡，截至今年八月底只收到七十二份申請，佔全港招牌零點六個巴仙咁大把，而且只有十五份獲認收，二十四份正處理緊，其餘則因為資料不全被打回頭，實際成效接近零，問你服未。
自願招牌檢核計劃之所以搞成咁，皆因屋宇署官僚冇腦。試諗吓，要求違例招牌業主自願申報，豈不是自投羅網？正如前線測量人員話齋，犯法嘅人點會自己踢爆自己o架。再講吖，當局宣傳不足，好多商戶連聽都未聽過相關計劃，又點會有成效喎。有藥房東主就講得啱嘞，小本經營難以支持高昂檢查費，如果當局唔係好似強制驗樓同驗窗咁提供資助，唔會考慮自動申報。咁又係吖，人不為己，天誅地滅，既然違例招牌掛喺度都唔會受罰，何必自討苦吃呢。
所以話，港產官僚眼高手低，志大才疏，計劃唔爛尾至奇吖。正如立法會議員批評，檢控違例招牌根本係屋宇署嘅責任，家陣竟然將責任轉嫁畀業主，簡直係本末倒置。違例招牌究竟有幾危險？唔係危言聳聽o架，○八年灣仔一間餐廳嘅大招牌突然倒塌，壓死一名女途人；去年底旺角又有個巨型招牌吊吊揈，搞到彌敦道嘅交通癱瘓六小時。你話嘞，屋宇署懶得就懶，蛇得就蛇，係咪靠害吖！
正所謂，一節見則百節知，除咗違例招牌遍地開花，屋宇署仲積壓大量建築物僭建個案亟待處理，呢個先至係大問題吖。無論點都好，都市炸彈無處不在，令人防不勝防，屋宇署仲唔做嘢，唔通真係要市民戴頭盔出街？叮！
