城中鏡：胡曉明泵水撐愛兒
一個瑞士名錶品牌早前舉行一百周年盛宴，城中名流爭相出席沾喜氣。菱電發展主席兼城市大學校董會主席胡曉明（Herman）同太太梁子慧帶埋細仔胡正忠齊到賀。Herman透露，兒子仲讀緊書，主修生物科技。咦？Herman父親胡法光綽號係「電梯大王」，唔通到咗第三代就轉行唔接棒家族生意？
胡曉明（右）隨時準備投資細仔胡正忠（左）嘅新生物科技新發明，相信身旁的胡太梁子慧都好期待。
趙國雄自爆係名錶收藏家，屋企已有十隻、八隻珍藏。
高叔平（左二）歡度七十歲生日，獲太太Betty（中）帶領全家齊祝壽。右一及二為高鼎國及太太張尹馨，左一為高偉國，前為高鼎國嘅一對寶貝仔。（受訪者提供）
Herman聽罷笑稱：「係我轉行先啱！」原來佢打算等兒子發明新生物科技後揼本投資，呢位富爸爸認真唔話得。當晚到場政商名人川流不息，包括鐘錶界老行尊孫秉樞、上海總會理事長王緒亮夫婦及金銀業貿易場前理事長李德麟夫婦等人，主人家華明行集團董事長高叔平夫婦、大仔香港鐘表業總會主席高鼎國及細仔香港表廠商會副會長高偉國齊齊招呼賓客。
高叔平賀70大壽
高叔平都講到當年外父李惠利創立鐘錶生意，二十六年前佢接班後，至今仍然做緊掌櫃，打算未來五年慢慢交棒，佢仲笑笑口話依家要兩個仔接生意畀佢做喎！當晚家人仲準備咗一個大蛋糕歡賀高叔平七十歲生日，現場氣氛好溫馨。
人稱「趙樓神」嘅長實集團執董趙國雄都有到場湊熱鬧，講起歐洲央行減息實行量化寬鬆政策，佢話咁意味本港短期內唔會加息，仍然睇好樓市後市。咁佢嘅投資策略係咪繼續買樓？趙樓神笑笑口話，早已有樓收租，反而間唔中都買吓股票、名錶咁啦！講到買錶，佢好雀躍話早前預訂咗一款值得收藏嘅名錶，仲話新貨到手會同大家分享一下喜悅！
