政壇：搞搞政：李國章同中大生互轟
中大烽火台又點火喇，曾任中文大學校長及教育統籌局局長嘅李國章，日前向罷課學生開火，又講到退學，中大學生會即日發表公開信還擊，仲話慶幸李國章唔係現任校長。尋日，李國章又辣火頭，質疑學生罷課只係唔返學「瞓耐啲」，唔算係犧牲同有承擔，佢又逐一反駁中大學生會封公開信，但轉個頭又被駁番，睇嚟呢場火有排燒。
設計圖片及對白
話罷課只係瞓耐啲
李國章唔覺自己嘅退學論講大咗，尋日出席活動後再度開腔回應，佢話大學生成日「走堂」，所謂罷課其實只係唔返學瞓耐啲，叫學生唔好再做騷，如果真係要犧牲，就要畀人睇到佢哋有承擔，退學咪有承擔囉！對於公開信要求佢收回言論，李國章寸爆學生係「小朋友」，非常可愛但「好情感化」，認為同「小朋友」對罵冇意思。不過，佢就沉唔住氣，三點反駁公開信內容，包括學生稱呼佢做「先生」係唔恰當，自言假假哋都係該校榮休教授，學生理應尊重自己學校喎。身兼行政會議成員嘅李國章，又否認自己喺香港電視發牌決定上有任何責任，仲自誇係「三三四」學制嘅功臣添！
張秀賢斥李小學雞
中大學生會會長張秀賢（Tommy）驚聞前校長回應，直斥對方太「小學雞」，佢又話，對方唔值得被尊稱「教授」，至於李國章作為行會成員，即使避嫌冇開會處理港視發牌決定，亦要體現行會集體問責制，盡政治責任；同埋李當年時任該校醫學院院長時，都有反對中大學制「四改三」，點解唔即時辭職以示抗議？
