政壇：歐陽英傑失銀包 上網求救速尋回
互聯網威力無窮，連尋找失物都得！有「星屑醫生」之稱嘅人民力量成員歐陽英傑，尋日就喺社交網站上演咗齣「尋銀包記」，仲憑人民嘅力量極速尋回。不過，呢次事件都令佢知道，原來同自己同名同姓嘅人唔少。
社交網站上，真係有多個歐陽英傑喎。（互聯網圖片）
尋日中午，星屑醫生喺社交網站求救，話唔見咗銀包，內有現金、八達通、身份證、信用卡同鎖匙，希望有心人幫手！短短三小時後，佢就報喜，話有好心人將銀包交咗畀警署，仲透露呢位路不拾遺嘅好心人，曾透過銀包上嘅個人資料喺社交網站搜尋佢，可惜網站太多「歐陽英傑」，唔敢貿貿然聯絡，而且星屑醫生淨係自家戶口都有兩個，最近又更新咗個人頭像，加咗滿臉假鬍鬚扮美國影星佐治古尼，就係咁，好心人為免搵錯人，寧願交去警署穩陣啲。
點都好，歐陽英傑由憂變喜，真係開心晒。
