政壇：「杭州佬」馬雲唔做港人

阿里巴巴唔揀香港上市，但網上就傳負責人馬雲落戶香港，仲話，佢明年就可以攞到香港身份證，已經買定樓等移民喇。唔知係咪時間比較敏感，馬雲好快就喺自己社交網站澄清，邊度都無諗住去，決意做個「杭州佬」。

馬雲澄清佢冇打算移民香港，只願做個「杭州佬」。（資料圖片）

「無計劃改變現狀」

馬雲一早就喺香港置業，仲經常嚟香港住吓，但話佢移民香港，馬雲就急急回應，仲寫咗一大段解釋，佢話，呢個報道實在令人哭笑不得，佢自己從來無考慮過移民去任何地方：「我在杭州出生，杭州上學，杭州創業，一直都是杭州戶口」，仲話做「杭州佬」不知幾好，「無任何改變現狀嘅計劃」。

咁係咪唔鍾意香港？馬雲都好醒，補飛話佢熱愛杭州，都好愛香港，亦好鍾意呢度嘅朋友、氣候、食物……最重要係香港係中國嘅一部分喎！