政壇：張宇人掌財會講明冇OT
立法會下月就復會，率先登場嘅係內務委員會及財務委員會（財委會）。上屆財委會最後兩個月一直喺拉布中度過，仲因為新界東北發展規劃前期工程撥款鬧出衝擊事件，依家仲累積近二十項議程未搞掂。新一屆立法年度中，建制派已經協調咗由飲食界張宇人（Tommy）揸莊做財委會主席，不過，仲未接棒嘅Tommy已經開定聲，講到明每星期嘅財委會只會開會兩節共四小時，即係議員個個都可以喺七點零鐘收工，佢話係為咗平衡處理累積嘅議程同議員「拉布」喎。
設計圖片及對白
Tommy未正式當選做主席，就急不及待同政府非正式討論過來年財委會會議安排，財委會主席係燙手到極嘅山芋，Tommy驚唔驚激進泛民「拉布」呢？佢就話冇得驚，又認為議員如果識得問問題，問六十條都唔會重複。但Tommy做主席可能仲有變數，皆因佢喺財委會開會首日要外遊，到時或者要寫定同意提名書先至得。
至於累積近二十項議程中，包括「三堆一爐」、創新及科技局開位等爭議事項，亦有公務員加薪等有共識事項，所以點樣調動議程，都幾考政府腦筯。
估計先傾廚餘中心
Tommy又認為，政府應該會首推早前中止待續嘅小蠔灣廚餘回收中心，皆因廚餘回收中心已經因為「拉布」延期，如果再唔提出，造價會再上升喎。
講起外遊，原來Tommy早前同老婆及友人，去咗坐遊船（river cruise）十幾日，沿萊茵河觀賞歐洲五國景色。佢身為基督徒，仲喺酒店煙房一邊食雪茄，一邊同信回教嘅多哈皇室成員親戚，討論基督教同回教對神嘅理解添！
