屋署拆僭建簷篷慢吞吞

「個簷篷爛咗咁耐都冇人整，係咪要跌落嚟揼死人先有人理？」楊先生指長沙灣青山道有大廈簷篷失修多時並搖搖欲墜，但業主一直未有派員維修，僅以膠紙修補，「電視廣告都有教啦，啲螺絲鬆咗就咁貼塊膠紙就算，點得o架？」

青山道一帶有大量僭建物搖搖欲墜，危害市民安全。

屋宇署發言人稱，去年接獲市民舉報後已派員到場檢查，認為該簷篷屬違法建築，結構有破損，但未有明顯即時危險，已去信勸喻業主自行清拆，惟有關人士未有遵從，故當局已發出清拆令，要求業主清拆涉事僭建物。

不過，楊先生認為屋宇署反應過慢，「青山道呢一帶周圍都係僭建物，個個都溶溶爛爛，但係屋宇署做一單都搞成年，幾時先清得晒啲僭建物？」楊先生希望署方能加強巡查，盡快清拆所有僭建物。