疫魔隨時臨門 官僚把關兒戲

唔係杞人憂天o架，伊波拉病毒喺非洲已經導致逾四千人感染，超過二千人死亡，連世界衞生組織都話數字可能被低估，仲話疫情已經失控，各國再唔伸出援手共同抗疫，伊波拉遲早造成全球大爆發。

好嘞，面對世紀疫症來勢洶洶，各國嚴陣以待，港府又點呢？話就話非常重視疫情，會做好把關喎。可惜又係得個講字，所謂嘅做好把關，只不過向西非旅客派發宣傳單張，要求醫護人員及航空公司提高警惕，同埋舉行一次應變演習咁大把，連旅客健康申報都懶得做，當局到底有幾認真防疫，唔使講都知啦。

嗱，市民眼睛係雪亮嘅，針對伊波拉威脅，有政黨進行民意調查，結果三成受訪者批評政府發放疫情資訊不足，九成認為要對來自疫區嘅旅客實施健康申報。傳染病專科醫生係咁講嘅，當局對疫情宣傳不足，會直接影響防疫成效，促請當局加強口岸宣傳及檢疫，長遠更應將預防傳染病加入中小學通識教育，讓市民從小培養防疫意識咁話。

冇錯嘞，大部分市民認識伊波拉嘅途徑，唔係睇新聞，就係上網，當局幾時有主動向市民講解呢？更離譜嘅係，衞生防護中心網頁竟然以內地譯名「埃博拉」代替港人叫慣嘅伊波拉，搞到好多市民一頭霧水。喂，連唯一官方宣傳渠道都唔清唔楚，仲點樣叫市民提高警惕呀？

正所謂，唔怕一萬，最怕萬一，家陣係地球村嘅年代，香港更加係全球主要交通樞紐之一，旅客來自四面八方，稍為掉以輕心，隨時萬劫不復。尤其係廣州有二十多萬名非洲人聚居，只要其中一個染疫，都可能引起大爆發，到時香港肯定無法獨善其身。當年嘅沙士慘劇就係前車之鑑，唔通港府咁快就忘記咗教訓？

其實，旅客健康申報不過係舉手之勞，沙士及禽流感時期都有咁做，偏偏今次慳番，你話港產官僚係咪懶得就懶，蛇得就蛇吖！

一句講晒，思則有備，有備無患。病毒無疆界，防疫梗係要做足準備，寧緊勿鬆啦。咁簡單嘅道理，唔使太一叮不斷提醒港產官僚嘞啩，叮！