立法會放暑假係議員離港旅行「充電」嘅好時機,議員鍾樹根都唔例外,唔係去加拿大,就係去澳洲墨爾本,但佢唔係去遊山玩水,而係去拜訪當地議會。雖然樹根好勤力,但都被佢太太詐型,話成個暑假流流長,竟然完全冇陪吓佢去旅行,搞到樹根今月初去湖南參觀訪問時都特登帶埋太太一齊去補數。

鍾樹根(右二)月初帶埋太太(右一)去湖南考察,希望找番暑假旅行條數。(受訪者提供)

試湘菜要走辣

樹根本月初同大約六百位港島各界人士去咗湖南長沙參觀拜訪,雖然只係短短三日行程,但佢都帶埋太太去,仲一齊參觀咗中國古代四大書院之一嘅岳麓書院、愛晚亭等名勝古蹟。去到湖南,又點可以唔品嘗一下中國八大菜系之一嘅湘菜呢?不過,湘菜以辣著稱,樹根就唔多受落,仲話自己係地道嘅廣東人,唔好辣嘢,所以佢喺當地餐廳食嘢時都特別叫大廚要走辣喎。

第一手消息請下載on.cc東網iPhone/iPad/Android/Windows Phone Apps