泛民呢輪有唔少有關佔中嘅動作,早前,佢哋安排咗幾十人喺屯門做演練,其中一個環節就係接受水炮衝擊,社民連嘅陶君行仲企定定捱水炮、好搶鏡添,雖然參加者大都畀水射到濕晒,但由於水炮力度有限,感覺好似係玩水多過演練。不過,佢哋嘅激情測試似乎有啲搞笑,事關消息話,本港警方根本無水炮車,亦無打算購入水炮車,所以,陶君行佢哋嘅演練,會唔會變咗係一場騷呢?咁樣睇嚟,示威者當日或者需要有特別衣着指引噃。

設計圖片及對白

用水炮驅散示威者或防暴,雖然係外國常見嘅手法,但警隊卻無意引入,加上估計佔中人士會靜坐佔領中環,所以警隊唔會買。不過,據聞警方近日已向消防處提出借用消防水車,以備應付佔中及相關行動。

借消防水車弱得多

據講,最初係社運界人士收到風,話警方會喺佔中期間出動水炮車,所以班泛民先走去搵部水車做演習。即使水車威力低好多,但佢哋都話一試無妨,點知,搞完大龍鳳濕晒身之後,先至發現原來警方防暴裝備中,係無水炮呢回事。消息話,就算○五年香港世貿會議,韓農到港示威,警方都只係借調消防水車作定點噴射,同出動防暴水車係兩種級數。

反而社運界人士遺忘咗警方年前曾經購入一批「聲波炮」,至今一直未曾亮相,到底佔中之日會否大派用場?泛民又會否做足準備應對聲波炮呢?

第一手消息請下載on.cc東網iPhone/iPad/Android/Windows Phone Apps