政壇：梁麗幗認嗌留學生罷課

學界罷課加上「佔領中環」行動一觸即發，一份聲稱係「香港2020/公民党（黨）英語語言組」嘅會議紀錄中文譯本尋日亦喺網上流傳，驚爆香港大學學生會會長梁麗幗建議，邀請外國留學生參與罷課甚至佔中，因為佢哋唔會受本地法律追究。

文件仲話解放軍一旦鎮壓佔中，佢哋會「區別對待中外學生」，更聲稱壹傳媒承諾會給予資金支持。梁麗幗承認，曾建議推動留學生罷課，但就絕對冇收過壹傳媒電話，亦唔需要壹傳媒捐款喎。

另外，學運領袖電腦嘅機密資料自然成為黑客嘅頭號目標。中文大學學生會會長張秀賢（Tommy）尋日喺社交網站自爆，指收到「香港電臺（台）」記者以電郵邀約訪問，不過，Tommy深感以電郵約訪問相當有可疑，所以冇打開電郵附件，否則肯定中毒都似。