政壇：工聯會五人爭勞界兩席
距離一六年立法會選舉仲有兩年，但政圈部署冇停過，立法會三個勞工界功能組別議席，一向都係由工聯會（工記）同勞聯「二一分」，工記內部又規定，兩個議席只可做一屆，有消息人士話，工記近期已開始物色下屆勞工界議席嘅接班人，同今屆一樣，佢哋都係推薦本身嘅區議員出選，據聞目前有五人榜上有名，打崩頭爭奪兩個議席。
陸頌雄（右）當年曾跟麥美娟（左）參選立會。（資料圖片）
據聞首名人選係元朗區議員陸頌雄，佢由○三年起當選至今，算係資深區議員，跟過雙料議員麥美娟參選立法會直選；第二位人選係葵青區議員梁子穎，佢亦係中學教師，喺聖公會林護紀念中學教理科，○七年起當選區議員，兩年前跟過陳婉嫻（嫻姐）條隊選超級區議員，依家係公共事業監察組召集人。餘下三位人選就係觀塘區議員簡銘東、何啟明同黃大仙區議員莫健榮，三人都跟過九龍東議員黃國健參選立法會。
至於現任兩名勞工界議員，其中身兼東區區議員嘅郭偉強，如果嫻姐唔連任由王國興頂上，郭偉強就順理成章接班選港島區。不過，身兼離島區議員嘅鄧家彪，由於新界西已經有麥美娟，所以佢好大機會轉戰新界東，仲打算喺大圍港鐵站附近開辦事處添！
