政壇：公民廣場執正禁示威
政府總部「門常開」變咗門常關之後，保安級數立即大大提升，泛民立法會議員已揚言，暑假後一定會同行政署署長蔡潔如拗過，不過，政府總部東翼前地「公民廣場」除咗加設鐵欄外，就連處理請願示威都「執正嚟做」，冇申請冇得入。日前，白鴿黨已經食咗閉門羹，未經申請，就只可以喺閘口請願，行政署禁令一一附諸實行，團體示威活動勢必大受影響，睇嚟，立法會復會後，政黨同政府又要講數嘞。
設計圖片及對白
當年葉劉「違規」遞信
話說日前民主黨本來想去「公民廣場」抗議坑渠油事件，但無門可入，行政署聲稱，未得署方批准，唔應該用東翼前地進行公眾活動，又話政總啟用以來，東翼前嘅地方一直係通道，情況由啟用至今大致相若，只差在未講埋，「公民廣場」個名係外界作出嚟嘅啫。
記憶所及，以往東翼未起圍欄前，唔少團體都走入去抗議同遞交請願信，其中一幕就係行政立法兩會議員葉劉淑儀嘅新民黨，原來都曾經「違規」到東翼前地遞信。
鳥籠管理不得人心
話說當時該黨同公民力量（公記）啱啱結盟，葉太就趁財政預算案公布前，帶埋公記成員向財爺曾俊華遞交請願信。不過，呢啲情況似乎以後都再冇呢隻歌仔唱囉，只係政府唔認保安加強咗，唔認以前唔會咁執正嚟做。
東翼加設圍欄及重開之後，所有團體都冇得入東翼前地，連建制派都冇情講，即使團體要嘈，蔡潔如都有得解畫，不過，依家嘅高設防，已經引嚟咁多批評聲音，政府總部一味引用鳥籠式管理，只會同市民嘅距離愈來愈遠啫。
