一場聲勢浩大嘅街頭運動即將爆發，參與者磨拳擦掌，各就各位……唔好誤會，太一叮講緊嘅唔係佔中罷課，而係家長擔櫈仔掗頭位，排通宵幫仔女撲幼稚園報名表呀！
嗱，幼稚園報名期又到嘞。當局係就係呼籲幼稚園增設網上無限派表，但本報瀏覽多間幼稚園網頁後發現，好多學校冇錯係喺網上派表，但要求家長親身到學校交表，咁即係逼佢哋走上街頭做「櫈仔黨」嘅啫。講到底，幼稚園學位不足，家長為求保險，預咗要多報名o架啦，既然報名表無限供應，一於漁翁撒網，有咁多間報咁多間。所以話啫，港產官僚做啲唔做啲，加表唔加位，解決唔到實際問題不特止，反而加重學校行政壓力，隨時激化排隊潮，你話係咪靠害吖。
有見及此，幼稚園梗係如臨大敵，做足自保措施啦。有學校揚言優先錄取本區學童，亦有學校唔設跨境校巴，仲講到明用廣東話進行面試，即係向跨境學童「提早落閘」囉。
即係咁，依家中港矛盾咁尖銳，去年幼稚園排隊引起無窮亂象，早排小學派位又引發本地同雙非家長罵戰，幼稚園對跨境學童敬而遠之，原因不難理解。之不過你有張良計，佢有過牆梯，千祈唔好低估跨境家長為子女求學嘅決心同埋毅力，有家長近日喺網上討論區分享心得，聲稱已豪花九千元人民幣委託中介公司代搶本港幼稚園學位。至於本區學生優先咯喎，分分鐘衍生賣地址等問題，盞添煩添亂嘅咋。
不過話分兩頭，雙非學童始終都係香港人，一樣有接受教育嘅基本權利，家陣竟然淪為人球被踢來踢去，即使有書讀都要長途跋涉，舟車勞頓，都咪話唔可憐。講到尾，都係拜前特首曾蔭權爵士所賜，佢老哥鼓勵本地生育不力，將雙非當做人口生力軍，中門大開，結果人口生力軍變人口炸彈，搶床位、搶奶粉，一直發展到今日搶學位，沒完沒了。
咪話太一叮唔警告，未來幾年，落嚟香港讀書嘅雙非學童有增無減，小一生愈派愈遠，今年有雙非學童居然被派到去東涌，十足「長征」咁款，認真陰功。當局再唔諗計增加學位，將來家長搶學位可能唔再係擔櫈仔逼上街頭咁簡單，逼上梁山都似。
始終都係嗰句，前人種禍，後人遭殃。係嘞，生產坑渠油嘅黑心商人都要下跪道歉，點解唔見曾爵士跪低謝罪呢？叮！
第一手消息請下載on.cc東網
