呢排忙到飛起嘅王梓軒，尋日仍抽空出席環保活動。
香港藝術發展局主席王英偉嘅歌手兒子Jonathan王梓軒尋日出席環保活動時話，佢近日忙於拍攝首部音樂電影，經常廢寢忘餐，佢話：「我好多謝媽咪成日幫我準備愛心飯盒，今朝早八點先收工，因為用拍MV嘅人數嚟拍一部音樂電影真係好忙，成日通頂。」佢話能夠喺百忙中尋找到快樂：「因為兩年冇出碟啦，年尾就有新專輯。」
鄭丹瑞話正籌備拍攝一部瘋狂喜劇。
Jonathan又透露剛完成劇集《華麗轉身》嘅煞科宴，並稱非常享受拍攝過程，佢話：「雖然拍戲辛苦，但我好鍾意，因為得到前輩嘅鼓勵同見到自己有進步。」日後想嘗試乜嘢角色？佢話：「唔知點解呢兩年參演四部劇都係做啲有精神問題同反派嘅角色，想做到啲有過程，最後會變好嘅角色，但我好感恩每次都可同強勁對手合作，只係唔想咁快被定型。」當然希望日後有更多參演嘅機會喇！
鄭丹瑞籌拍瘋狂喜劇
同場仲有「蛋哥」鄭丹瑞擔任司儀，佢話將忙於電影工作，但各方面仍需時間鋪排：「因為上一部戲票房同口碑都好好啦，所以突然有啲壓力，題材同上次唔同，應該會係一部瘋狂喜劇。選角方面，我希望可以帶啲新面孔畀觀眾，又可以培育多啲新人嘛。」
第一手消息請下載on.cc東網
