新馬季尋日正式開鑼，沙田馬場逼到爆，除咗吸引到一班等到頸都長嘅馬迷到場感受氣氛，梗係唔少得一班馬主同馬會董事局成員啦！見到剛接棒成為新任馬會主席嘅Simon葉錫安同新大董Margaret梁高美懿一早到場，仲雙雙攜眷出席。而剛由大董升任副主席嘅周永健，更一上任就立即拉頭馬，佢話上次親自拉頭馬已經耐到唔記得咗係幾時，所以非常開心。

周永健（左）帶埋太太胡慕芳入場，一開季就拉頭馬。

梁高美懿（右）爆老公梁承達早佢二十幾年已做咗馬會會員。

新任馬會主席葉錫安（左）帶埋太太一齊出席馬季開鑼日。

連串活動慶祝130周年

今年係馬會一百三十周年，啱啱返港不久嘅葉錫安透露，已經準備好迎接嚟緊嘅繁重工作，事關佢之前趁馬季抖暑期間，去咗唔同地方行吓。

葉錫安仲話馬會嚟緊會有一連串嘅慶祝活動，但預咗喺下個月先向大家公布，暫時要賣個關子。

身兼創興銀行副主席兼董事總經理嘅Margaret，未做大董前已經常喺馬場出沒，對於今次進身馬會董事局，佢自爆喺二○○○年開始已成為馬會會員，但如果同老公梁承達相比，就仲差好遠喇，因為梁生早喺一九七八年就已經係馬會一分子喇！Margaret又透露，佢決定競選馬會大董，最主要原因都係欣賞馬會嘅慈善工作，特別係醫療及教育方面，期望今後可以繼續喺呢方面幫到馬會同市民大眾。

第一手消息請下載on.cc東網iPhone/iPad/Android/Windows Phone Apps