黎智英昨現身機場，獨自走往航空公司櫃位辦理登機手續。
話說廉政公署早前直搗壹傳媒集團主席黎智英位於嘉道里道嘅大宅，就佢秘密向多個泛民政團同人士捐款嘅醜聞進行大搜查，但未有即場拘捕黎智英。尋日我哋發現黎智英一支公鬼祟現身機場，自行辦理登機手續後步入禁區。唔知佢係咪收到風廉署即將有進一步行動，所以要急急「着草」離開香港呢？
黎智英入閘時僅揹住一個輕便背囊，冇其他大型或手提行李。
尋日上午約十一時，黎智英連同太太及兒子乘坐七人車離開寓所，駛往尖沙咀某酒家用膳，食到約一點鐘就離開。其中黎智英獨自坐番架七人車直接駛往機場，佢太太同兒子就由另一架車接返屋企。
黎智英約於一時半抵達機場後，獨自落車走往國泰航空嘅櫃位辦理登機手續，期間見佢僅揹住一個輕便背囊，冇其他大型或手提行李，隔多一陣就入咗機場禁區。由於該段時間有多班國泰航機，所以唔肯定佢到底飛去邊。
此外，我哋大前日見到同樣因捐款醜聞而遭廉署搜屋嘅工黨立法會議員李卓人，與太太一齊拖埋行李坐車去咗機場，當時有消息話佢係乘坐一班飛住美國嘅客機。不過李卓人尋日卻現身佔中黑布遊行，自言當日佢同太太只喺去機場送機，唔係坐飛機。但問佢到底送邊個機，佢又神神秘秘唔肯講。究竟佢係咪單純帶埋太太同行李送機，定係因為行蹤敗露而臨時取消行程，真係好難講。
第一手消息請下載on.cc東網
