設計圖片及對白
喺上屆立法會會期，反對新界東北發展計劃嘅人士衝擊立法會大樓後，冇耐行政署就以加強保安設施為由，宣布將人稱「公民廣場」嘅添馬艦政府總部東翼前地關閉，進行加建鐵欄嘅工程，外界鬧爆政府咁做係唔聽民意，搞到「門常開」變咗「門常關」，但鬧還鬧，行政署當聽唔到，工程本來喺暑假就完工，點知行政署又話因為受天雨影響，工程要延期竣工添！
加設咗永久性鐵欄嘅公民廣場，終於喺上周三重開，不過政府疑似諗縮數，規定每逢周日同公眾假期嘅指定時間先畀團體申請集會，以為抗議示威次數就會減少，不過有人最近發現呢個諗法係「捉蟲」，聽聞由戴耀廷等三子發起嘅佔中行動同反佔中陣營，都希望搶到周日黃金時間舉行集會，仲要今個星期申請失敗，就會順延下個星期申請，直至申請到為止，睇怕未來兩、三個月，政總想有平靜嘅周日都難嘞。
專上學生聯會早前宣布本月二十二日舉行罷課，其後申請一連十日喺公民廣場集會，但行政署以申請時間超越開放時間為由拒絕，相比之下佔中就有策略性部署，打算跟足規矩逢周日都申請集會，直到佔中正式爆發為止。
愛字派想飲頭啖湯
不過同一時間，據聞好多愛字頭團體有意申請喺公民廣場集會，加上保衞香港運動傅振中、九龍社團聯會等都打算喺即將來臨嘅周日集會，擺明係想搶佔中頭啖湯。話時話，政府限定集會時間，分分鐘導致每周日都上演政治大龍鳳，唔知呢啲係咪叫自己搵石頭掟自己隻腳呢？
第一手消息請下載on.cc東網
