開講有話，悠悠萬事，民生為大。對於絕大部分市民嚟講，發展經濟，搞好民生，安居樂業比任何嘢都重要。可惜吖，今日香港好似撞邪咁，政治壓倒一切，民生冇人過問，連關乎七百萬人切身利益嘅全民退休保障計劃都被棄如敝屣，講起真係可悲。
嗱，由港大學者撰寫嘅全民退保研究報告發表咗接近一個月，居然好似石沉大海咁，完全引唔起社會討論。最離譜係嗰班政客，之前大聲疾呼要求當局盡快推行全民退保，依家報告出咗嚟，佢哋反而不屑一顧，問你服未。既然政客闊佬懶理咯喎，政府梗係卸得就卸喇，相關官員就算間中提到全民退保，亦只係講幾句官腔，耍幾下太極，敷衍了事，完全冇誠意。
正所謂，人生有幾多個十年。全民退保前後講咗幾十年，究竟幾時落實，當局既冇時間表，又冇路線圖，擺明敷衍民意啫。係人都知，港府一向縮骨卸膊，根本唔想承擔全民退保嘅責任，尤其係財政司司長鬍鬚曾更成日以「結構性財赤」恐嚇市民添；加上家陣香港陷入政治狂熱，政改爭議愈演愈烈，政客嘈喧巴閉，淨係識得佔中及罷課，連中學生都被捲入漩渦。喺咁嘅情況下，港府仲唔乘機博懵，將全民退保束之高閣咩。
講起真係諷刺，政客為政改方案「原地踏步」定「袋住先」拗餐飽，而同港人息息相關嘅民生政策就備受冷落，連討論都懶得討論，再咁落去，睇怕所謂全民老年金分分鐘連「袋住先」嘅機會都冇埋，老人家都唔知點算好。
話時話，香港社會愈來愈政治化，行政立法關係愈來愈惡劣，有人為反對而反對，為拉布而拉布，港府好似跛腳鴨咁，寸步難行，又點止全民退保議而不決吖。大家有眼見，無論係經濟政策，或者係民生措施，港府幾乎係「推出一項、跪低一項」，冇一樣嘢可以順利推行，港產官僚乘機蛇王，抱住多做多錯、少做少錯、唔做唔錯嘅心態混日子，做一日和尚敲一日鐘，搞到成個香港好似停擺咁，有乜辦法唔沉淪吖！
正如古詩所云，無可奈何花落去。香港內鬥內耗，競爭力每況愈下，邊緣化危機迫在眉睫，講到底都係因為政府無能，政客無良，面對咁嘅環境，市民除咗望天打卦之外，仲可以點做呢？唔通香港真係氣數已盡？叮！
第一手消息請下載on.cc東網
