潮語「面交」可以話係「內交」之後又一「交」字輩潮語。當然「面交」係不含任何政治成分。「面交」其實係一個網上購物專用潮語，亦係由內地傳入。「面交」嘅意思係「見面交收」嘅縮寫。因為有時喺網上買賣，尤其係一啲貴重物品，例如名錶同汽車，基於驚寄失又或者喺運送途中有意外，通常都係興買賣雙方「見面交收」，均真地貨銀兩訖。所以喺網上購物網站，又或者一啲買賣討論區，有時都會標明「面交」，即係要見面交收。當然，唔排除有時網上有啲涉及色情嘅買賣，都會以「面交」方式處理，不過呢一種「面交」可能會觸犯法例，隨時監都有得坐。
網上購物，不經不覺已成為大家生活一部分。依家生活好多用品，甚至係最新嘅時裝家品家電，都可以透過互聯網買得到。有啲網上交易平台，每日係能夠做上億嘅生意，甚至更多。有好多OL每日返工，其實好多時間都係上啲網上交易平台，睇吓有咩新貨賣，直情係用工作時間去「鳩嗚」。好多年輕一代，只要喺網上打出一啲關鍵字，就能夠搵到想要嘅嘢，仲會寄到去你屋企。記得以前搞話劇要搵道具搵戲服，你要花一日，甚至幾日時間去行街搵。今時今日，只要撳幾個掣就能夠淘得到寶，無論你搵和服古裝，甚至古物古劍，網上交易平台都有，仲要平到你唔信。冇錯係方便咗，但係就冇咗以前真係喺街上面購物尋寶嘅樂趣。最近有一款新嘅手機開賣，亦係透過網上商店全球公開發售，唔使排隊，只需鬥快上網撳掣就得。不過奇怪在呢款新手機，喺全球發售，但係竟然冇強國份！呢樣嘢絕對傷害咗強國人民感情。強國人想買，要透過香港，網上訂購，然後才可以「面交」。美國人咁嘅安排，到底居心何在？
講返轉頭，美國公司發行新手機，點解會冇中國份？有大陸網民忿而發起杯葛行動。但相信主要原因，可能係因為大陸不誠實使用電腦者實在太多。大陸好多人都係呢款手機嘅Fans，如果喺大陸開售，隨時變成國家級網絡襲擊，真係唔講得笑！
第一手消息請下載on.cc東網廣告人、網台主持 阿東
