設計圖片及對白
自港大學者周永新份全民退保建議文件出咗後，坊間對於呢個討論嘅聲音少咗好多，成本高昂係一大障礙，更大問題係又要供多一份錢，打工仔真係頂唔順。勞工及福利局局長張建宗尋日出席一個活動後，畀人問到呢件事，佢話，政府會以開放態度聽意見，遲吓有公聽會，又話呢個問題需要考慮好多嘢，包括下月四日政府召開扶貧高峰會公布嘅貧窮線等，咁講法，呢張退保期票有排等喇。
小肥張話，立法會喺十月及十一月嘅兩個星期六有公聽會，佢會親自出席聆聽巿民同各方意見，至於探討全民退休保障前路嘅過程中，佢哋都會全面考慮推出長者生活津貼後，依家四十二萬名基層長者生活是否都有咗明顯改善。
盼通過低收入津貼先
不過，佢對全民退保呢個議題嘅急切性，似乎唔及低收入家庭津貼，立法會休會前，財委會無休止嘅拉布，搞到好多議程都拖慢晒，所以，佢特別希望放完暑假嘅立法會，一返嚟就盡快通過低收入在職家庭津貼撥款，等二十多萬個家庭嘅七十多萬名基層巿民可以受惠。
第一手消息請下載on.cc東網
